Продажбата на „Nike“ се опорави во летниот квартал, откако претходно падна за време на пандемијата на коронавирусот. Добрите резултати се должат на фактот дека растечката дигитална продажба го неутрализира падот на приходите во традиционалните продавници.
Компанијата за спортска облека соопшти дека нејзините приходи достигнале 10,6 милијарди долари во кварталот што заврши на 31-ви август. Ова е за 1% помалку од истиот период од минатата година. Сепак, дигиталната продажба скокнала за 82 проценти.
„Ова се моменти кога силните можат да станат посилни“, рече извршниот директор Џон Донахју во конференцискиот повик со аналитичарите. Според него, за време на пандемијата, компанијата доби удел на пазарот со брендовите „Nike“ и „Jordan“ и се врати на растот на меѓународните пазари, вклучувајќи ги Кина и Европа.
Новите резултати покажуваат пресврт во однос на пролетниот квартал, кога приходите на „Nike“ паднаа за 38% поради затворањето на продавниците. Цената на акциите на „Nike“ се зголеми за 9% за време на доцното тргување, откако резултатите се покажаа подобри од очекуваните.
„Nike“ тврди дека скоро сите нејзини продавници биле отворени во текот на кварталот, но компанијата продолжува да известува за помал сообраќај во своите продавници поради пандемијата и безбедносните мерки.
Коронавирусот ги принуди „Nike“ и другите трговци да ги затворат своите физички продавници, владите да ги ограничат патувањата и многу купувачи да останат дома. Иако повеќето американски држави постепено ги олабавуваат мерките за блокада, појавата на бројни нови случаи на ковид-19 ги попречува плановите за тивко отворање на економијата на земјата.
Во исто време, вирусот предизвика прекин на повеќето спортови. Сепак, многу спортски лиги ги продолжија своите активности. Националната кошаркарска асоцијација (НБА) и Националната фудбалска лига (НФЛ) се меѓу нив. „Nike“ ги спонзорира и двете првенства.
„Nike“ тврди дека троши помалку на маркетинг поради одложените или откажаните спортски настани. Ова доведе до поголем профит, иако бруто-маржите се намалија.
За фискалниот прв квартал, нето добивката достигна 1,52 милијарди долари или 95 центи по акција. Тоа е скоро двојно повеќе отколку што предвидуваат аналитичарите на Вол Стрит. Во истиот квартал минатата година, „Nike“ оствари 1,37 милијарди долари нето добивка.
Во последниве месеци, компанијата продолжи да посветува поголемо внимание на сопствените продавници, веб-страница и апликации. Директната продажба донесе 3,7 милијарди долари во кварталот, или 12 проценти повеќе од една година порано. „Nike“ ги користи своите веб-страници и апликации за купување за да објави ограничен број на некои модели на патики.
Иако многу спортски сали се затворени, пазарот за спортски производи е многу баран за поудобна облека бидејќи повеќе луѓе работат и тренираат во своите домови.
