„Microsoft Corp.“ во понеделникот соопшти дека планира да ја купи „ZeniMax Media Inc.“, сопственик на издавачот на видео игри „Bethesda Softworks“, за 7,5 милијарди долари во готово, што претставува најголемо купување во овој сектор досега.
„Bethesda“ е издавач на игри како што се „The Elder Scrolls“, „Doom“ и „Fallout“ и исто така има најмалку два наслови кои ќе дебитираат следната година. „ZeniMax“, со седиште во Роквил, Мериленд, е сопственик на неколку други студија низ целиот свет. Таа е една од најголемите приватни компании за игри со 2.300 вработени ширум светот, соопшти „Microsoft“.
„Microsoft“ ќе ја лансира новата генерација на конзолата „Xbox“ во ноември во исто време со „PlayStation 5“ на „Sony Corp.“. Игрите избрани за новиот „Xbox“ досега разочараа некои гејмери, особено откако „Microsoft“ го одложи својот најголем наслов, „Halo Infinite“, до следната година.
„Microsoft“ се потпира на својата услуга за претплата на „Game Pass“ за да привлече корисници и да ги зголеми приходите, и потребна и е привлечна содржина за да привлече клиенти кон овој производ. „Microsoft“ соопшти дека „Game Pass“ веќе има 15 милиони претплатници, наспроти 10 милиони објавени во април.
„Игрите од „Bethesda“ отсекогаш имаа посебно место на „Xbox“ и во срцата на милиони гејмери ширум светот“, рече извршниот директор на „Xbox“, Фил Спенсер.
„Microsoft“ очекува трансакцијата да се затвори во втората половина на фискалната 2021-ва година, која завршува на 30-ти јуни, и да има „минимално“ влијание врз прилагодените оперативни приходи за тековните и последователните фискални години.
„Почетната постава на „Sony“ за „PlayStation 5“ е посилна од онаа на „Microsoft“ и се очекува оваа машина да ги надмине новите „Xbox“, „Series X“ и „Series S““, изјави Џорџ Гигијашвили, аналитичар во „Omdia“.
„Bethesda“ е основана од Кристофер Вивер во 1986-та година и првично развиваше симулациони игри за фудбал и хокеј пред да ја објави „The Elder Scrolls“ во 1994-та година.
Структурата и управувањето на „Bethesda“ нема да бидат променети, соопшти „Microsoft“.
