Германскиот производител на автомобили „Volkswagen Group“ очигледно има намера да купи удел во минхенската компанија за изнајмување автомобили „Sixt“. Двете компании водеа разговори за можен влез, пренесува германското издание „Мanager magazin“.
„VW“ планира да влезе со удел од околу 15 проценти, според упатените извори, веројатно поделен на обични и приоритетни акции, а „Sixt“ подготвува зголемување на капиталот. И „Volkswagen“, и „Sixt“ засега не ја коментираат оваа тема.
Во последните неколку години, „Volkswagen“постојано се обидуваше да основа заеднички вложувања со „Sixt“, како на пример за заеднички автомобили. На крајот, сепак, компанијата за изнајмување автомобили секогаш одбиваше такво партнерство, но сега вратата е отворена, велат изворите. Самото семејство Sixt, кое сè уште контролира поголем дел од правата на глас, нема намера да продава никакви акции, но новиот голем акционер беше добредојден во сегашната ситуација.
„Sixt“ ја преживеа кризата со коронавирусот подобро од некои други компании за изнајмување автомобили. Продажбата падна за скоро 40 проценти во првата половина на 2020-та година, а „Sixt“ објави загуба, но индустријата соопшти дека последните неколку месеци повторно покажале подобрување.
