„Google“ ги соопшти резултатите од своето работење во вториот квартал од оваа година. Иако е забележан раст во приходите овој гигант не успеа да ги достигне предвидените очекувања, па поради тоа нивните акции забележаа пад од 5 проценти.
Тие пријавија заработка по акција од 9.54 долари, односно приход од 14.11 милијарди долари што е за 19 проценти повеќе во однос на истиот период од минатата година.
Меѓутоа аналитичарите предвидуваа заработка по акција од 10.4 долари, а се предвидуваше раст од 20 проценти во однос на 2012-та година.
Остварениот нето-приход изнесуваше 3.23 милијарди долари.
„Ова беше одличен квартал за „Google“ со преку 14 милијарди долари приходи. Со повеќе уреди, повеќе информации и повеќе „online“ активности како никогаш претходно имаме огромен потенцијал да го унапредиме животот на луѓето“, вели извршниот директор Лери Пејџ.
