Владата на Дубаи инјектираше 7,3 милијарди дирхами (2 милијарди долари) во националната авиокомпанија „Emirates“, откако пандемијата на коронавирусот во март го стопираше патувањето со авион. Доколку е потребно, владата на Дубаи е подготвена да испрати дополнителна помош на својата водечка авиокомпанија.
Емиратот претходно оваа година објави дека се обврзал да обезбеди финансиска поддршка за најголемиот светски превозник на долги релации, а проспектот за обврзници што го гледа „Bloomberg“ го покажува износот на помошта дадена во изминатите пет месеци.
„Секоја дополнителна поддршка ќе зависи од барањата на авиокомпанијата и нејзиниот обем и ќе биде под влијание на времетраењето на моменталната состојба со ковид-19“, се вели во проспектот.
„Emirates“ е сериозно погодена од пандемијата бидејќи компанијата управува со највисока категорија авиони – „Airbus“ и „Boeing 777“ – кои превезуваат патници помеѓу сите делови на земјината топка. Патувањето на долги патеки се очекуваше полека да се опорави од кризата, бидејќи патниците избегнуваа долги патувања и жаришта на пандемијата.
Дубаи се приклучува на списокот на земји кои биле принудени да интервенираат за да ги спасат своите национални превозници. Главен пример е „Lufthansa“, која добива милијарди долари за да се одржува за време на кризата.
Иако првичните пикови од инфекцијата ослабнаа, што пак отвори многу граници, темпото на опоравување во секторот беше попречено од следните ограничувања на патувањето за да се спречат појавите на епидемијата.
„Emirates“ продолжи со дел од редовните патнички летови на 21-ви мај по пауза од два месеци.
Авиокомпанијата очекува да ја зголеми својата мрежа на 80 дестинации во септември, рече главниот оперативен директор Адел Ал Редха во интервју претходно во овој месец. До 2021-ва година се очекува да бидат опслужени сите дестинации.
„Emirates“ започна процес за отпуштање на илјадници вработени. Во исто време, превозникот разгледува и други начини за оптимизирање на работењето.
