После пет дена маратонски преговори, лидерите на државите членки постигнаа договор за планот за обновување на Европската унија тежок 750 милијарди евра и седумгодишен буџет од 1.074 милијарди евра.
„Успеавме. Верувам дека овој договор ќе се смета за клучен момент на европското патување, но исто така ќе нè внесе со иднината“, рече претседателот на Европскиот совет Чарлс Мишел во понеделникот во раните утрински часови.
Планот за обнова од 750 милијарди евра предвидува 390 милијарди неповратна помош и 360 милијарди заеми.
Меркел и Макрон го поздравија договорот
Германската канцеларка Ангела Меркел и францускиот претседател Емануел Макрон го поздравија утрово „историскиот ден“ за Европа по договорот за економски план за закрепнување на ЕУ постигнат на петтиот ден од самитот на лидерите на ЕУ во Брисел.
„Тоа е историска промена за нашата Европа и за нашата еврозона. Направен е голем чекор“, рече Макрон на прес-конференцијата, додавајќи дека за два месеци „изграден е консензус за реализација на невиден план за економско закрепнување“.
Ангела Меркел рече дека се чувствува „големо олеснување по тешките преговори“ и додаде дека Европа сепак покажа дека „може да дејствува заедно“.
„Тоа е важен сигнал кој е над Европа. Тоа е одговор на најголемата криза со која се соочува Унијата уште од своето основање“, рече германската канцеларка.
