„Xiaomi“ има целосен потенцијал да се претвори во уште една кинеска сензација на пазарот на паметните телефони. За првите шест месеци од 2013-та, компанијата регистрирала приходи во вредност од 2.16 милијарди долари. За споредба, за целата 2012-та година тие изнесуваат 2.05 милијарди долари.
„Заборавете на финансиските резултати, тие не се најважните. Најважно е да правиме производи во кои ќе уживаат корисниците и ќе носат долгорочни придобивки”, вели Леи Јун, извршниот директор на „Xiaomi“.
Во рамките на првите шест месеци од оваа година, „Xiaomi“ продале 7.03 милиони паметни телефони. Додека тој број не е толку импресивен, но растот на кинезите е многу брз и е можно во блиска иднина да биде претекнат компании кои се во криза, како „HTC“ и „BlackBerry“.
Што се однесува до „Xiaomi“, кај нив акцентот е на уреди со моќен хардвер и прифатлива цена. Претходно оваа година моделот „Mi2S“ дури успеа да го надмине „Samsung Galaxy S IV“ во споредбата на перформансите.
„Xiaomi“ се приклучи на сонародниците „Huawei“ и „ZTE“, кои исто така влегоа ударно кај паметните телефони и дури се најдоа во топ 5 на најголемите снабдувачи.