Околу 140.000 работни места се задржани благодарение на мерката за финансиска поддршка на фирмите заради исплата на платите, рече министерката за финансии Нина Ангеловска во гостување во емисијата „Само вистина“.
-Ова е навистина обемна мерка која има за цел да ги заштити работните места и да им помогне на компаниите ликвидносно да исплатат плати. За оваа мерка имавме оставено во Буџетот околу 100 милиони евра, токму со цел за да оставиме соодветен простор за дополнителни потреби согласно развојот и случувањата во економијата. Таа мерка беше креирана од вториот сет мерки, а сега ние се наоѓаме во фаза на постепено реотворање на економијата за што креиравме трет сет на мерки. Секој сет на мерки се носеше за даден тајминг согласно моменталните услови и случувања со кризата – вели министерката Ангеловска.
Владата донесе уредба за продолжување на мерката и за месец јуни, односно наместо два месеци како штп беше планирано претходно мерката ќе може да се позлува од работодавачите и самостојните вршители на дејност три месеци.
Министерката информира дека за месец април на околу 20 илјади компании им се исплатени околу 30 милиони евра, додека во мај има нешто помалку барања, што говори дека дел од компаниите немале пад на приходите од 30 проценти за овој месец. За мај заклучно со денеска се исплатени 21 милион евра на околу 17.500 компании.
-Опоравувањето нема да се случи преку ноќ, меѓутоа мора да бидеме свесни дека стопанските комори и бизнис заедницата треба што поскоро да се адаптираат на новосоздадената ситуација. Ќе има нови бизнис модели коишто ќе се појават, ќе има компании коишто ќе се реструктуираат и затоа дел од мерките од третиот сет се всушност и за помагање во прилагодувањето на новите услови, за воведување нови технологии. Мерката која беше донесена неделава на Влада, за која е надлежно Министерството за економија предвидува 20 милиони евра директна финансиска поддршка во стопанството за зголемување на конкурентноста, на индустријата… односно и за тие да се охрабрат во овој период да инвестираат и притоа да добијат значајна поддршка од Владата, буквално како партнер во процесот со тоа што кофинансира до 20 проценти од инвестицискиот проект – вели министерката.
