Samsung телефон со батерија од 6.000 mAh

Samsung официјално го претстави новиот модел на телефон, Galaxy M21, чија главна карактеристика е батеријата со капацитет од 6.000 mAh. Со оглед дека станува збор за телефон од средна класа, има солидни други спецификации. Се заснова на осумјадрен Exynos 9611 чипсет, а во понудата се две варијанти – со 4 GB RAM и 64 GB простор за складирање, или 6 GB RAM и 128 GB меморија.

Достапен модел со добри карактеристики

Телефонот има тројна задна камера (48 MP, 5 MP и 8 MP), додека предната камера има 20 MP. Екранот е со дијагонала од 6,4 инчи, базиран на AMOLED технологија, со FHD + резолуција и Corning Gorilla Glass 3 заштита. Покрај тоа, на задниот дел се наоѓа сензор за отпечатоци на прсти, како и стандарден 3.5 mm приклучок за слушалки. На телефонот претходно е инсталиран Android 10 оперативен систем.

Засега е предвидено, Galaxy M21 да се продава само во Индија (почнувајќи од 23 март), по цена еквивалентна на 175 долари за основниот модел. За посилниот модел не е одредена цената, но се претпоставува дека ќе чини околу 200 долари. Се очекува по неколку месеци овој телефон да биде достапен и на другите пазари, но производителот не посочи кога би можело тоа да се случи.