Американската компанија BankMyCell на корисниците им нуди услуги за откуп на стари телефони, во соработка со партнери како што се телекомуникациски оператори или трговци на електронски уреди. Низ нивниот систем поминуваат големи количини на користени телефони, па врз основа на тоа креирале статистика за движењата на цените на најпопуларните модели низ времето.
Падот на вредноста на нов телефон е најголем на почетокот, тоа е јасно на сите, но има големи разлики помеѓу моделите.
Во првата година, новиот iPhone губи во просек 23 проценти од вредноста, а по две години таа загуба изнесува 45 проценти. Во споредба со Android висока класа ова е одличен резултат – новите Android flagship телефони веќе во првата година губат во просек 45 проценти од вредноста. За две години, просечен Android станува 71 процент поевтин. Овие податоци се однесуваат на американскиот пазар.
Кај “поевтиниот” Android, оние со почетна цена помала од 350 американски долари, ситуацијата е уште понеповолна. По првата година на користење вредноста во просек ќе падне за речиси 49 проценти, а по две години за речиси 80 проценти. За три години, Android првично купен за 300 долари ќе може да се продаде за околу 30 долари.
BankMyCell директно ги спореди и најпопуларните конкуренти на пазарот лансирани во 2018 година: iPhone XR, XS и XS Max во однос на линијата Galaxy S10. Додека Apple телефоните во првата година изгубија помеѓу 21 и 26 процент на вредноста, цената на половен Samsung од истата класа потона на секундарниот пазар за 38 проценти па се до над 45 проценти.
IPhone XR, најпродаваниот телефон минатата година, заврши како и најисплатливиот флегшип, со просечна загуба на вредноста од само 21,5 проценти во првата година. Кај Samsung најисплатлив бил Galaxy Note 8 со просечен пад на вредноста од 35 проценти.
Во категоријата на поевтини уреди, најисплатливи се покажаа Sony Xperia L2 (15,5 проценти), Nokia 7,1 (-16,7 проценти) и HTC U12 + (-18 проценти). Списокот на најлоши, по прашањето откупни цени, по првата година го предводат Motorola One (-76 проценти), Samsung Galaxy A6 (-75 проценти) и Samsung Galaxy J3 (-69 проценти).
Коментари