Компанијата Starbucks очекува значително помала продажба во кинеските продавници во вториот квартал од оваа година поради коронавирусот.
Во февруари, продажбата во кафетериите кои се отворени најмалку 13 месеци паднала за 78 проценти во однос на претходната година, поради привременото затворање, и намалување на бројот на работни часови, наведоа главниот извршен директор Кевин Џонсон и финансискиот директор Патрик Грисмер.
Пред ширењето на коронавирусот, компанијата очекувала продажбата да скокне за 3 проценти во продавниците кои се отворени најмалку 13 месеци. Сега очекуваат пад од 50 проценти и помеѓу 400 и 450 милиони долари помалку приход во Кина во однос на очекувањата. Исто така, може да се очекува и одложување на отворањето на некои кафетерии, пренесува CNN.
Во февруари, Starbucks затвори околу 80 проценти од своите кафетерии во Кина. Повеќето оттогаш се повторно отворени, па сега 90 проценти од Starbucks кафетериите во Кина повторно работат.
Но, ситуацијата е далеку од идеална. Starbucks и понатаму мора да го намали бројот на работни часови и да го намали бројот на места за седење во кафетериите за посетителите, поради коронавирусот, да можат да седат на доволна одалеченост.
Од компанијата очекуваат во наредниот период 95 проценти од кафетериите да бидат повторно отворени, но со ограничена услуга.
