Intel официјално ја заврши продажбата на главнината од својот бизнис со модеми на Apple. Овој потег беше најавен во јули, а вредноста на продажбата изнесува една милијарда долари.
Со преземање на сопственоста на оваа технологија, Apple ќе добие повеќе компоненти за идните уреди под своја капа и ќе ја намали зависноста од надворешните добавувачи. Сепак, може да се каже дека овој потег е изнуден, бидејќи е познато дека Apple не е во добри односи со Qualcomm.
Инаку, продажбата се однесува само за модеми кои се наменети за паметни телефони. Intel ќе продолжи и понатаму да произведува модеми за компјутери, ИоТ гаџети и автономни возила.
Apple уште од својот прв iPhone се обидува да произведе што е можно повеќе телефонски делови под своја капа. Првите три модели користеа процесори на Samsung, по што Apple направи сопствени процесори. Ова и овозможи на компанијата да ги унапреди и оптимизира процесорите според сопствените потреби и барања. Со најновата аквизиција, уште една важна технологија доаѓа под ист покрив, така што можеме да очекуваме Apple наскоро да воведе модел со 5G конекција.