Кина во вторникот официјално ја основаше бродоградбената компанија China Shipbuilding Group, која државната радио-телевизија China Central Television (CCTV) ја прогласи за најголема во светот.
Основањето на компанијата се базира на минатомесечното обединување на двете водечки кинески бродоградилишта, China State Shipbuilding Corpa и China Shipbuilding Industry Co, забележува Reuters. China Shipbuilding Group опфаќа 147 истражувачки институти, деловни оддели и компанија чии акции котираат на берзата. Располага со имот во вредност од 790 милијарди јуани (112 милијарди долари) и вработува 310.000 работници, според CCTV.
Активностите на групата вклучуваат изградба на бродови за различна употреба, од специјализирани бродови за вадење нафта и гас до носачи на авиони.
Кина се обидува да го намали државниот сектор со спојување и реструктуирање на средствата за да го спречи растот на долгот и да обезбеди услови за попрофитабилно работење на компаниите и нивно подобро прилагодување кон потребите на пазарот.
Главни конкуренти на Кина во бродоградбата се Јужна Кореја и Јапонија, потсетува Reuters.
