На азиските берзи дојде до голем пад на акциите откако заострувањето на трговската војна меѓу САД и Кина доведе до неизвесност во глобалната економија.
Најголем пад забележа хонгконшкиот индекс Hang Seng, дури 3,3 проценти.
Јапонскиот Nikkei започна да паѓа веднаш штом берзите се отворија и забележа пад од 2,3 проценти.
Австралискиот индекс S&P/ASX 200 падна за 1,5 проценти, јужнокорејскиот KOSPI 1,7, додека шангајскиот Composite забележа пад од 1,2 процент, објави AP.
Стивен Инс, менаџер во Валур маркети во Сингапур, вели дека е тешко да се процени како понатаму ќе се развива ситуацијата и дека сите очекуваат што следно ќе рече американскиот претседател Доналд Трамп.
”Најдоброто што Трамп може да го направи за стабилноста на пазарот е да молчи”, изјави Инс.
“На пазарот во моментот владее страв од транзициска рецесија во САД, иако американската економија сè уште се одржува добро и во голема мерка се заснова на трошење. Ако каматните стапки паѓаат, трошењето веројатно ќе се зголеми и ќе служи како тампон зона за економијата”, додаде Инс.
Трговскиот спор помеѓу Вашингтон и Пекинг, особено неговата непредвидливост, сигурно ќе има штетни последици за Азија, наведува AP.
Агенцијата додава дека непредвидливоста влијае на одлуките на централните банки за фискалната политика и компаниите во врска со своите стратегии и инвестиции, што доведува до неизвесност на пазарот.
