Најверојатно новата борба за домејните е пред нас со оглед дека Њујорк е првото место во Америка кое доби домејн од прва класа „.nyc“. Градоначалникот на градот Њујорк, Мајкл Блумберг лично ја објави оваа новост, а притоа истакна дека новиот домејн значително ќе им помогне на жителите и бизнисмените себеси да се претстават како вистински њујорчани.
Тој истакна дека тие сега ќе можат да се идентификуваат на интернет со градот Њујорк кој е еден од најмоќните брендови во светот. Одобрението за новиот домејн градот Њујорк го доби од Интернет корпорацијата за доделување на имиња и броеви (ICANN) уште во мај месец.
Оваа организација работи веќе неколку години на промовирањето на новите домејни кои ќе бидат повеќе локализирани домејни за градови, држави, организации,работи и слично и кои ќе се надоврзат на веќе постоечките како што се „.com“, „.org“, „.net“ и „.edu“.
„ICANN“ најави во февруари дека оваа година ќе лансира стотина нови домејни од прва класа, што ќе биде најголемото зголемување на домејни после многу години.
