Вработените во последниот македонски загубар по кој знае кој пат излегоа на протести. Од Прилеп дојдоа во Скопје и поставија шатори пред Владата, а дел од нив најавуваат дека ќе започнат и штрајк со глад доколку не се најде трајно решение за компанијата.
Работниците поставија камп пред Владата
Вработените од Еурокомпозит пристигнаа во Скопје и поставија шатори пред Владата. Велат дека ќе останат таму се до исполнување на нивните барања – исплата на 18 заостанати плати, придонеси за последните 7 години, како и отпремнина за вкупно 154 работници кои доброволно потпишаа да бидат прогласени за технолошки вишок.
Бараат итна средба со премиерот Зоран Заев и со вицепремиерот Кочо Анѓушев, а најавуваат и штрајк со глад доколку надлежните останат глуви на нивните барања.
„Вчера не примија само членови на кабинетот на вицепремиерот, наводно тој бил на пат и не можел да не види. Ни ветија дека утре најкасно понеделник ќе ни исплатат дел од парите, но така викаат веќе со месеци. Не им веруваме. Подготвени сме да започнеме и штрајк со глад, а дефинитивно остануваме овде во шаторите што ги поставивме синоќа“ изјави еден од работниците кои се стационирани спроти зградата на Владата.
Вработените велат дека власта речиси две години само ги залажува и купува време, а не нуди трајно решение за нив.
„Во јуни ќе поминат две години откако ги добивме првите ветувања од оваа Влада. На првата средба со вицепремиерот ни рече дека за шест месеци проблемот ќе биде решен. Од тогаш не е мрднато ни милиметар. На следната средба ни вети дека за три месеци ќе биде се средено, па пак немаше ништо. Последен пат се видовме на 29 март кога беше во Прилеп и пак ништо“ вели друг вработен во Еурокомпозит.
Работниците веќе неколку пати поставуваат камп пред Владата. Од Скопје си заминуваа за Прилеп откако ќе добиеја ветување или мал дел од заостанатите побарувања што ги имаат.
„Овие лаги немаат крај, остануваме сега тука до крај. Знаме дека проблемот не се решава преку ноќ но од некаде мора да се почне. Ако треба и со глад ќе штрајкуваме“ вели вработен во последниот македонски загубар.
Владата вели дека се бара трајно решение
Од Владата велат дека се посветени на наоѓање одржливо и трајно решение за комбинатот. Прв чекор бил прогласувањето на технолошки вишок на дел од вработените.
„Со измени на Законот за обезбедување на невработените лица поради приватизацијата на претпријатијата со доминантна сопственост на државата, 153 лица од компанијата се згрижени и добиваат месечен надоместок“ велат од Владата.
Оттаму додаваат и дека претставниците на синдикатот и на вработените биле информирани за сите чекори кои се преземаат за надминување на проблемите во комбинатот, а пред се за можните решенија поврзани со обврските од работниот однос на вработените.
„Се бара решение со сериозни странски стратешки партнери кои се заинтересирани за инвестирање во „Еурокомпозит 11 октомври“. На тој начин се очекува да се решат и други прашања поврзани со правата на вработените во комбинатот, односно исплата на дел од заостанати придонеси по основ на работен однос, се вели во соопштението“ велат од Владата.
Ревизори: компанијата не е самоодржлива
Последниот достапен ревизорски извештај се однесува на 2016-та и тој покажува дека компанијата не може да биде самоодржлива.
Според извештајот приходот од продажба бил одвај 40 милиони денари, трошокот само за вработените бил 58.55 милиони, а вкупните трошоци 110.56 милиони денари.
Вкупните приходи последните години имаат драстичен пад. Во 2014 година биле над 100 милиони денари, во 2015 година изнесувале 65.5 милиони а во 2016-та паднале на 40 милиони денари. Во истиот период се намалуваат и расходите од работењето на компанијата, но со значајно помал интензитет.
„Постои материјална неизвесност на претпоставката за одржување на континуитетот на работењето на друштвото“ се заклучува во ревизорскиот извештај.
Од југословенски гигант до македонски загубар
Еурокомпозит е последна од десетината фирми ќерки кои произлегоа од некогашниот гигант Еуроинвест „11 Октомври“ кој имаше над 1.600 вработени.
Еуроинвест бил формиран во Прилеп во 1952-та како фабрика за електро изолациски материјали. Дваесет години подоцна станува дел од компанијата Енергоинвест Сараево, а кон крајот на 70-те ја проширува дејноста кон производи за специјална намена како воена и полициска опрема и термо реактивни прес маси.
Со распадот на Југославија започнува распадот и на Еуроинвест. Во 1991-та македонската подружница е трансформирана во холдинг со 1.800 вработени.
Холдингот беше сочинет од повеќе правни субјекти Еурофуд, Еуроламинати, Еуротрејд, Еуропрофил, хотел Липа. Овие компании една по една одеа во стечај. Последна е Еурокомпозит која беше трансформирана во акционерско друштво со капитал 100% во сопственост на државата. Во 90-те имаше 550 вработени а сега се останати уште 260.
Програмата на Еурокомпозит е поделена на две главни гранки: воена и полициска опрема и цивилна линија. Има широка палета производи – од балистички шлемови, елеци и плочи до рачни ракетни лансери; како и електро изолациони материјали. Компанијата уште пред 20 години е сертифицирана со стандардот ISO 9001.
Фабриката во моментов не произведува, а вкупните долгови надминуваат 5 милиони евра.
Главен проблем е континуираниот недостиг од работа, па изминатите години се случуваше вработените со месеци да бидат пуштени дома со 70% од платата во очекување на некој подобар договор. Кога пак ќе се договореше зделка се работеше и во две смени.
К. Н.
