Празни продавници и валкани ходници. Најголем дел од старите трговски центри изгледаат како сцени од хорор филм.
Одамна помина „златното време“ на Олимпико, Алуминка, Скопјанка и ред други. City Mall, Ramstore, Vero, Captiol им пресудија на овие објекти кои го имаа своето „златно време“ во 90-те.
„Ова е нормален процес. Новите објекти нудат подобри услови, купувачите го препознаваат тоа“ објаснува консултантот за недвижности Борис Филиповски. „Ние очекуваме овој процес да продолжи и да се засили особено со отворањето на нови модерни молови од затворен тип“ вели тој.
Дел од старите трговски центри, како Буњаковец, Бисер, Лептокарија и Беверли Хилс, се уште успеваат да се изборат на пазарот иако и тие полека ја губат битката. Сепак, нивната структура полека се менува – има се помалку бутици, а се повеќе адвокатски канцеларии, фризери, бербери.
„Тие се уште функционираат релативно добро благодарение на добрата локација. И толку. Во суштина не нудат ништо различно“ вели Филиповски. „Главниот проблем е големиот број сопственици кои тешко се организираат особено за одржување на заедничкиот простор. Најголем дел од нив веќе се постари од две децении и им треба реновирање но никој не се нафаќа да инвестира. Очекувам уште повеќе да почне да ги гази времето“, додава тој.
Од друга страна новите трговски центри со современи стандарди како City Mall, Capitol, Ramstore, Vero работат и повеќе од добро.
„Овие центри се сосема друга приказна – организирани за да понудат се што им треба на потрошувачите на едно место… Дополнително кај нив се застапени и светски брендови што ги нема на друго место“ смета Филиповски.
Закупнините на малопродажниот простор во главниот град бележат намалување изминативе неколку години, иако премиум локациите се уште држат цена. Метар квадратен на премиум локација во трговските центри чини и над 40 евра, во центрите во населбите достигнува 12 евра, додека на главните пешачки зони изнесува 30-на евра.
И покрај големиот број на трговски центри во Скопје, познавачите велат дека постојат услови нивниот број и натаму да расте. Во моментов се градат трговскиот центар Лимак веднаш зад старата железничка станица, трговскиот во склоп на комплексот Џевахир во Аеродром како и Емпорио Мол во Ѓорче Петров, а наскоро треба да почнат градежните активности и на Скопје Ист Гејт на просторот на Скопскиот саем кој треба да прерасне во најголем мол во Македонија.
К. Н.
