Компанијата за реосигурување „Swiss Re“ очекува побарувања во вкупна вредност од 1,3 милијарди долари за четвртиот квартал од минатата година, откако пожарите во Калифорнија, тајфуните во Азија и загубата на сателит влијаеле на резултатите на компанијата на крајот на 2018-та.
Компанијата со седиште во Цирих соопшти дека очекува најтешкиот крај на годината да доведе до парична „тежина“ од побарувања во износ од 2,9 милијарди долари за целата 2018-та како последица како на природни, така и на големи катастрофи предизвикани од човекот, соопштува „Ројтерс“.
Таа очекува загубите во индустријата за осигурување во целина да е 81 милијарди долари. Износот иако е голем и е далеку од рекордните 144 милијарди долари во 2017-та година, според „Swiss Re“ износот ако остане без промена, ќе е четвртиот по големина во историјата.
Само смртоносните пожари во Калифорнија, во кои загинаа 85 лица и над 20.000 објекти беа уништени, ќе доведат до побарувања од „Swiss Re“ за сума од 375 милиони долари, а оние од тајфуите Џеби и Трами во Азија до 320 милиони долари.
Загубата на сателит, големиот индустриски пожар во Германија и зголемувањето на очекуваните побарувања за поплавите од браната Итуанго во Колумбија, исто така се очекува да влијаат.
„Последниот квартал од 2018-та година беше тешко погоден од природни катастрофи“, вели во соопштението Едвард Шмит, главениот осигурител на „Swiss Re“.
„Работиме одблизу со своите клиенти, за да гарантираме дека засегнатите лица и заедници ќе бидат поддржани“, додаде тој.
