Водечката социјална мрежа во светот повторно се соочува со проблеми – поради грешка приватните пораки на голем број корисници на Фејсбук станаа јавни. Грешката се појавувала во периодот од 18 до 27 мај и од неа биле погодени 14 милиони корисници, јавуваат американските медиуми.
Во текот на тој период, личните кориснички подесувања автоматски и без знаење на корисниците се менувале така што целата фејсбук-заедница можела да ги види содржините кои биле наменети само за тесен круг на луѓе.
Ерин Еган од Фејсбук тврди дека грешката во меѓувреме е поправена и им се извини на корисниците на социјалната мрежа. Фејсбук со месеци се соочува со проблеми поради злоупотребата на личните податоци на корисниците. Информации за милиони корисници завршија кај фирмата „Кембриџ Аналитика“, која без дозвола наводно ги искористила за изборната кампања на американскиот претседател Доналд Трамп. Неодамна беше објавено и дека Фејсбук им овозможил пристап до податоците за дел од корисниците на повеќе кинески технолошки концерни.
