„Кока кола“ го пушти во продажба својот прв алкохолен пијалок, кој е наменет за јапонскиот пазар. Oвој пијалок со вкус на лимон ќе се продава во три варијанти, со јачина меѓу 3 и 8 отсто алкохол. Целната група е помлада популација, особено жени.
Во духот на традицијата на компанијата, рецептот се чува во тајност, но тој е направен врз основа на популарниот јапонски пијалок „чу -хај“, кој е мешавина од локален алкохол и широка палета на овошни вкусови, што се нарекува алкопоп. „Чу-хај“ во Јапонија се рекламира како алтернатива за пиво и особено е популарен меѓу жените. Најпопуларни вкусови се грејпфрут и лимон.
Од компанијата велат дека засега немаат намера да го донесат овој производ и на други пазари. Ова е првиот алкохолен производ на компанијата во нејзината 132-годишна историја.
Американската компанија влегува на многу конкурентен и сегментиран пазар, во кој големите јапонски играчи, како Suntory Holdings Ltd., Kirin Holdings Co. и Asahi Group Holdings Ltd., држат најголем дел од продажбите во големите супермаркети.
Иако во периодот од 1977 до 1983 година Coca-Cola поседува акционерски удел во американската винарија Taylor Wines, компанијата никогаш не предлагала алкохолни пијалоци директно на пазарот во целата своја историја, која датира од 1886 година.