Следната генерација на „Opel Mokka“ целосно ќе ја промени архитектурата на возилото, дело на „GM“, а шефот на брендот Михаел Лошелер ги откри причините за оваа одлука.
„Наследникот на „Mokka“ требаше да е „SUV“, изграден на архитектурата на „General Motors“, но се покажа дека платформата е премногу тешка и покрај тоа не дава можност за електрификација“, беше искрен Лошелер пред списанието „Carbuyer“. „Затоа реков: „Не, мораме да го запреме“. Тешка платформа, поголема потрошувачка на гориво, без електрификација“, дополни Лошелер.
„Mokka“ е на европскиот пазар од крајот на 2012-та година, а во 2016-та претрпе редизајн, добивајќи ја и ознаката „X“ во името. Новиот „SUV“ ќе биде за моделот 2020-та и ќе биде достапен следната година.
Откако „Opel“ мина под капата на „PSA“, повеќе од логично е дека следниот „Mokka“ да е изграден врз платформата која се користи кај следната генерација на „Opel Corsa“, „DS 3 Crossback“ и новиот „Peugeot 208“.
Лошелер потврди дека преминот кон платформата на „PSA“, исто така, беше поттикнат од електрификација на моделот. Тој објасни дека развојот на моделот беше привремено замрзнат, но сега е обновен, веќе со платформата и компоненти кои доаѓаат од „Peugeot“ и „Citroen“.