Американскиот претседател Доналд Трамп денеска предвиде дека Кина ќе ги укине трговските бариери и изрази оптимизам дека и покрај тензиите, двете најголеми економии во светот ќе постигнат договор за интелектуална сопственост.
Вашингтон и Пекинг се заканија едни со други во последниве денови со воведувањето на царински давачки за производи чиј увоз се мери со десетици милијарди долари.
Трамп напиша на својот Твитер профил дека “Кина ќе ги сруши своите трговски бариери, бидејќи тоа е вистинската работа” и додаде дека царините ќе станат реципрочни и дека ќе се постигне договор за интелектуална сопственост.
Тој исто така укажа на неговите лични односи со кинескиот претседател Кси Џипинг, потсетувајќи дека тие секогаш ќе бидат пријатели, додавајќи: “Голема иднина за двете земји”.
