Извозот на оружје од САД во последните пет години заклучно со 2017 година, е зголемен за 25 отсто, според податоците објавени денеска на Меѓународниот институт за мировни истражувања (СИПРИ) во Стокхолм.
Околу 34 проценти од вкупниот светски извоз на оружје припадна на САД, а на второ место е Русија со учество од 22 отсто од глобалниот извоз, според њујоршката агенцијата “Блумберг”.
Следни се Франција, Германија и Кина, кои ја задржаа позицијата на најголемите извозници на воена технологија, додека Индија е најголемиот увозник.
Продажбата на оружје на Блискиот Исток, Азија и Океанија е зголемен, додека од друга страна, пак, забележан е послаб прилив на оружје во земјите од Африка, Јужна и Северна Америка и Европа.
Дури 49 отсто од извозот на оружје од САД отиде на Блискиот Исток, а Саудиска Арабија благодарение на скок на увозот од 225 отсто во последните пет години, стана втор најголем увозник на оружје во светот.
Во периодот 2013-2017 година, глобалната трговија со оружје се зголеми за 10 отсто во споредба со претходниот петгодишен период, рече СИПРИ.
