На интернет страната на кинеската агенција TENAA се појавија три нови паметни телефони од посебниот бренд на компанијата „Huawei“, „Honor“. Сите три уред засега се познати само по ознаките на моделите, а тоа се „AUM-TL20“, „ATU-TL10“ и „AUM-TL00“.
Првите два споменати модели содржат осумјадрен процесор со такт од 1,4 GHz, 5,7-инчен „TFT“ екран во формат 18:9 и резолуција од 1440 x 720 пиксели, 3 GB RAM, 32 GB интерна меморија со можност за проширување со „microSD“ картичка и батерија од 2900 mAh. Индентична е и нивната фотографска компонента која се состои од двојна задна камера (комбинација од 13 и 2 мегапикселни сензори), како и 5 мегапикселна предна камера.
Третиот модел, „AUM-TL00“, зa разлика од претходните модели нема сензор за отпечаток на прстот (на задната страна), а наместо 3 GB RAM и 32 GB интерна меморија има и 2 GB RAM и 16 GB интерна меморија за чување податоци. Разликата е во фотографските компоненти кои се состојат од една задна 13 мегапикселна камера и 8 мегапикселна предна камера.
Oстатокот од функциите е индентичен со оние кои ги имаат другите два модели, па така сите три уреди доаѓаат со оперативен систем „Android 8.0 Oreo“. Како што во практика се прави, засега не е познат датумот за пристигнување на овие уреди на пазарот.
