Најголемиот кабелски оператор во САД, „Comcast“ упатил понуда од 31 милијарди долари за купување на „Sky“ – европската група за платена телевизија, која веќе договори купувањето од „Fox“ на Руперт Мардок, соопштува „Ројтерс“.
„Comcast“, која ги поседува „NBC“ и „Universal Pictures“, соопшти дека понудила сума од 12,50 фунти по акција, што е значително над понудата од 10,75 фунти по акција, договорена од „Fox“.
Новиот предлог го соочува „Comcast“ против Мардок, кој помогна за лансирање на „Sky“ во Велика Британија, но и против „Walt Disney“ која договори купување на серија на средства од „Fox“ по завршувањето на договорот, вклучувајќи и „Sky“.
„Comcast“ рече дека таа сè уште не се обврзала со „Sky“ за понудата.
„Ние би сакале да ја поседуваме целата „Sky“ и целиме да добиеме повеќе од 50% од нејзините акции“, коментира извршниот директор на „Comcast“, Брајан Л. Робертс во соопштението.
„„Sky“ и „Comcast“ се совршена комбинација: и двете компании се лидери во создавањето и ширењето на содржина“, рече Робертс во конференциски повик. „Иновацијата е во срцето на она што го правиме: со комбинирање на двете компании, создаваме значителни можности за раст“.
„21st Century Fox“ договори купување на оние 61% од „Sky“ кои не беа нејзина сопственост, во декември 2016-та година, но купувањето на неколку пати беше одложено поради загриженоста на регулаторите дека Мардок ќе контролира премногу медиуми во Велика Британија.
Некои акционери на „Sky“ веќе почнаа да се жалат дека понудата е премногу ниска.
