Расипани производи, неквалитетни услуги, сомнителна храна – колку муштеријата е секогаш во право и каде треба да се обрати кога има некој проблем?
Организацијата на потрошувачи (ОПМ) е првото место кое го бираат граѓаните за своите поплаки. Таму годишно стигнуваат по околу три илјади претставки.
Најголем дел од нив се однесуваат на неквалитетни производи кои се расипале непосредно по купувањето, како и за непочитување на гарантните рокови.
„Апелираме до потрошувачите, во вакви случаи да бараат продолжување на гарантниот рок, поради тоа што согласно Законот за заштита на потрошувачите, гарантниот рок на производот се продолжува за онолку време колку што истиот е даден на сервисирање. Потрошувачите секогаш мора да бараат да им биде даден сервисен налог со точни датуми на предавање и примање на производот, што е единствен доказ за извршеното сервисирање“ велат во ОПМ.
Граѓаните може да побараат совет и да се пожалат на одреден производ или услуга секој работен ден од 10.30 до 14.00 часот на телефонскиот број на ОПМ: 02 / 3179 – 592. Освен организацијата на потрошувачи и повеќе државни органи воведоа директни телефонски линии за пријавување на неправилности. Расипана или храна со изминат рок се пријавува во Агенцијата за храна на 0800 3 22 22. Високи телефонски сметки или лоша услуга од телекомуникациските оператори се пријавува во Агенцијата за електронски комуникации на 190. Неиздавање фискална сметка и слични проблеми се пријавуваат до Државниот пазарен инспекторат на 02 / 3220 – 547.
Македонија ги има имплементирано сите европски директиви во оваа област, пред законот муштеријата најчесто има право, но продавачите, сервисерите и давателите на услуги не секогаш го прифаќаат тоа.
К. Н.
