Зголемувањето на акцизата за нафта, според Левица, е погрешна мерка и во однос на економијата и во однос на заштитата на животната средина. Враќањето на евтината тарифа за струја и укинувањето на радиодифузната такса беа само чекор за предизборен маркетинг на СДСМ, кој отвори дупка во буџетот. Сега, со покачување на акцизата за нафта за 3,5 денари и со новиот тарифник за вода од страна на Регулаторната комисија (при што ќе се зголеми цената на водата), се компензира намалувањето на буџетот на сметка на граѓаните, велат од Левица по повод најавеното зголемување на акцизата за дизел-горивото.
„Несериозни се тврдењата дека покачување на цената на дизелот ќе го намали загадувањето. Покачувањето на цена на дизелот најмногу ќе ги погоди земјоделците, чии машини за обработка на земја се потрошувачи на нафта. Возила што користат дизел ги користат голем дел од понеимотните граѓани токму поради ниската цена на дизелот. Владата не треба да задира во џебот на работниците и осиромашените граѓани, туку буџетот да го полни од џебот на бизнис-елитите, кои, за разлика од нив, можат тоа да си го дозволат. За жал, не можеме да очекуваме Влада во која што партиципираат бизнисмени и милионери да застанат на страна на интересот на работникот“, велат од Левица.
Оттаму додаваат дека оваа мерка е регресивна, а не прогресивна бидејќи, процентуално, повеќе ќе го погоди домашниот буџет на посиромашните граѓани отколку на побогатите.
„Сумата на зголемените средства што ќе ги плаќа сиромашниот граѓанин нема да е пропорционално помала од таа што ќе ја плаќаат побогатите, во однос на примањата/имотот. Мерката на коалициската влада на СДСМ-ДУИ е во директна спротивставеност со ветеното во однос на економско прогресивните мерки. Неморално е да се искористува народната огорченоста поради огромното хронично загадување, заради ситни политикански игри“, се наведува во соопштението од Левица.
