Германскиот авиопревозник „Ер Берлин“ најави дека најдоцна до 28 октомври ќе ги стопира летовите.
Компанијата во август прогласи банкрот и нејзините авиони летаат благодарение на заемот од државата. Тогаш управата почна преговори со повеќе инвеститори за продажба на делови од компанијата.
Разговорите со „Луфтханза“ и „Изиџет“ ќе траат до четврток, а по склучувањето договори, „Ер Берлин“ ќе ги запре операциите. Превозниците „Ники“, која лета кон туристички дестинации, и „Ел-џи волтер“, кој работи во состав на „Ер Берлин“, не се несолвентни и тие и понатаму ќе функционираат.
Повеќето од летовите на „Ер Берлин“ до подалечни дестинации веќе се откажани.
„Луфтханза“ е заинтересирана за некои од летовите на „Ер Берлин“ што ги покриваат 81 авион, а „Изиџет“ е заинтересиран за летовите на кои сообраќаат од 27 до 30 авиони.
