Иднината на 8.000 вработени во германската авионска компанија „Air Berlin“, која е во постапка на стечај, ќе биде одлучена по парламентарните избори во Германија на 24-та септември, пренесуваат медиумите.
Планот е да се донесе конечна одлука на 25-ти септември, изјави портпаролот на компанијата Ралф Кункел.
Крајниот рок за наддавање за имотот на втората најголема германска авиокомпанија истекува денес.
„Air Berlin“ требаше да ја започне процедурата за банкрот минатиот месец, откако најголемиот акционер – „Etihad“, ја стопираше финансиската поддршка заради долгогодишните загуби на компанијата. Нејзините авиони се уште летаат благодарение на Владата на Германија со заемот во износ од 150 милиони евра (180 милиони долари). Парите ќе стигнат најдоцна до средината на ноември.
Има многу потенцијални купувачи за имотот на превозникот, при што „Lufthansa“ е на челната позиција.
Поранешниот пилот во Формула 1, Ники Лауда вчера соопшти дека тој и авиопревозникот „Condor“, кој е дел од групата „Thomas Cook“, ќе понудат околу 100 милиони евра (119 милиони долари), за да купат една четвртина од флотилата на „Air Berlin“.
Конзорциумот планира да купи 38 од 144 авиони на „Air Berlin“ и неговото поделба „Niki“, соопшти Лауда во интервју за австрискиот весник „Курир“.
Лауда го создаде „Niki“ во 2003-та година и го продаде на „Air Berlin“ на крајот на 2011-та година.
Кинескиот инвеститор Џонатан Пан и германскиот бизнисмен Ханс Рудолф Ворт исто така се вклучија во наддавањето.
