Кинескиот автомобилски концерн „Geely“ ќе се здобие со контролниот пакет акции на производителот на спортски автомобили „Lotus“. Сите детали од договорот се договорени, а се очекува договорот да биде потпишан до крајот на јули.
Концернот „Geely“ ќе купи 49,9% од акциите на производителот на автомобили од Малезија – „Proton“, на тој начин ќе стане сопственик и на 51% од британската компанија „Lotus“, која уште од 1996-та година е под контрола на „Proton“.
Засега финансискиот дел од договорот останува тајна. За „Geely“ ова ќе биде второ европско засилување, откако во 2010-та година кинескиот концерн целосно го откупи шведскиот производител „Volvo“.
„Proton Edar Sdr Holding“ е најголемиот автопроизводител во Малезија, а по своето основање започнува да составува и продава модели на „Mitsubishi“. Подоцна нуди и сопствена палета автомобили, а во 1996-та година го купи контролниот пакет на британската „Lotus Cars“. Во јуни 2010-та година „Proton“ го купи и тимот „Renault F1 Team“.
Гласините за новата продажба на компанијата од Малезија се појавија уште пред неколку месеци, а се очекуваше таа да помине под контрола на француската алијанса „PSA Peugeot-Citroen“ или во компанијата „Renault“.