Кочо Анѓушев, Александар Зарков и Неби Хоџа се кандидатите кои ги предлагаат стопанските комори на Македонија за вицепремиери за економски прашања во новата влада.
Анѓушев е потпретседател на Стопанската комора на Македонија, Зарков е извршен директор на Сојузот на стопанските комори (ССК), а Хоџа е претседател на Стопанската комора на северозападна Македонија (СКСЗМ).
Ставот на трите комори е идентичен, дека бизнисот треба да биде директно вклучен во економската и развојната политика на државата и дека треба да има пристап во подготовката на законите пред тие да ги поминат филтрите на владата, а не откако ќе влезат во собраниска процедура.
Вицепремиерот за економски прашања треба да делува во насока на креирање стратегија за развој на приватниот сектор, на поголема продуктивност, поголем број вработувања, подобрување на деловното опкружување и овозможување негов раст и развој, порачува бизнис заедницата.
Според коморите, неопходно е целосно усогласување на владините политики со интересите на стопанството.
