ТТК Банка АД Скопје во првиот квартал од 2017 година дејствуваше во насока на остварување на своите приоритетни цели и задачи дефинирани во Деловната политика и Финансискиот план на Банката, при што во текот на периодот го прилагодуваше своето работење на тековните економски и пазарни услови на стопанисување.
Банката во периодот 1.1-31.3.2017 година оствари позитивен нето-оперативен приход пред исправка на вредност на финансиски и нефинансиски средства во износ од 16,8 милиони денари.
Исправката на вредноста на нефинансиски и финансиски средства на нето-основа влијаеше финансискиот резултат на Банката во овој период да изнесува -17,1 милиони денари.
Нето-приходите од камати изнесуваат 61,4 милиони денари и се пониски за 7,9% во однос на истиот период од минатата година, во најголем дел како резултат на повисоките расходи за камата кои произлегуваат од зголемената депозитна база на годишно ниво. Остварените нето-приходи од камати се целосно во согласност со планираните, односно степенот на исполнување на планот е 100,2%.
Нето-приходите од провизии и надоместоци за услуги во периодот јануари-март изнесуваат 29,8 милиони денари. Најголем придонес во структурата на оваа позиција имаат приходите од провизии коишто потекнуваат од платниот промет во земјата и во странство за правни и физички лица, но исто така и од генерираните провизии од сегментот кредитирање. Планираните нето-приходи од провизии се остварени со 101,6%.
Нето-приходите од курсни разлики изнесуваат 2,6 милиони денари и во однос на минатата година бележат зголемување за 4,0%. Остварувањето на планот изнесува 119,8%.
Останатите приходи од работењето на Банката изнесуваат 5,1 милиони денари. Степенот на исполнување на планот е 103,6%.
Вкупните оперативни трошоци во анализираниот период изнесуваат 82,2 милиони денари и, споредено со истиот период минатата година, се повисоки за 4,1% како резултат на повисоки материјални и административни трошоци и повисоки трошоци за вработени. Реализираните оперативни трошоци се во согласност со планираните, односно степенот на исполнување на планот е 99,8%.
Во согласност со Одлуката за сметководствениот и регулаторниот третман на средствата преземени врз основа на ненаплатени побарувања, во периодот 1.1.-31.3.2017 година евидентирана е исправка на вредност на нефинансиските средства на нето-основа во износ од 21,2 милиони денари, што е за 16,4% пониско оштетување во однос на минатата година. Подобрувањето на споменатата позиција се должи на континуирани напори за продажба на преземените средства.
Исправката на вредноста на финансиските средства на нето-основа во анализираниот период изнесува 12,6 милиони денари и издвоените исправки на вредност соодветствуваат со обемот, структурата и квалитетот на пласманите на Банката.
Финансискиот извештај можете да го погледнете тука.
