Речиси два месеци од светската премиера, започна сериското производство на новата генерација на „SUV“ моделот „XC60“.
Новиот „XC60“ има пред себе тешка задача, а тоа е да го продолжи успехот на претходникот кој имаше 30% од продажбата на „Volvo“ aвтомобилите.
Компактниот „SUV“ е целосно редефиниран во споредба со првата генерација, како во поглед на дизајнот, така и на технолошки план. Aвтомобилот е поставен на новата „SPA“ механичка платформа, која веќе ја користат моделите „XC90“, „S90“ и „V90“.
Дизајнот на надворешноста исто така го следи стилскиот јазик кој веќе можеме да го видиме во споменатите три возила.
Палетата на мотори опфаќа 2.0-литарски четирицилиндарски дизели и бензинци од најновото семејство на „Volvo“ мотори, како што се дизелите „D4“ со 190 ks и „D5“ со 235 ks. Покрај тоа во понудата ќе биде и бензинецот „T5“ со 254 ks, како и „T6“ со 329 ks и 400 Nm максимален вртежен момент.
„XC60“ е опремен со истиот хибриден „T8“ погонски систем кој го користи и „XC90“. Станува збор за „Plug-in“ хибрид со вкупна комбинирана моќ од 407 ks кој овозможува овој „SUV“ oд 0 дo 100 km/h да стигне за само 5,3 секунди.
„Volvo XC60“ се изработува во фабриката Торсланд во Шведска.
