Пад на телефонијата. Минатата година завршила со значителен пад и на фиксните и на мобилните претплатници, а минимален раст кај корисниците на интернет и на кабелска телевизија. Најчесто пријавуван проблем во Агенцијата за електронски комуникации минатата година биле високите сметки, по што следат приговорите за неквалитетна или ненавремена услуга, како и прекини во врските.
Пад од 7.25% кај мобилните претплатници
2016-та завршила со 2 милиони и 49 илјади претплатници на мобилен телефон што е за 160 илјади или 7.25% помалку во однос на 2015-та, покажуваат податоците на штотуку објавениот годишен извештај на Агенцијата за електронски комуникации (АЕК).
Околу половина од броевите се при пеид а половина пост пеид.
По спојувањето, Оне.Вип го надмина Македонски телеком во бројот на претплатници, 51% се кај новоформираниот оператор, а 49% кај Т-Мобиле односно Телеком.
Просечно еден претплатник остварува по 108 телефонски повици месечно, најголем дел (74%) во сопствената мрежа.
Пад од 1.6% кај фиксните претплатници
Пад има и во сегментот на фиксна телефонија – бројот на линии се намалил за 6 илјади односно за 1.6% до 366 илјади. Од нив 323 илјади се кај домаќинствата, а 43 илјади кај деловните субјекти.
Според податоците на АЕК 60% од фиксните линии се кај Македонски телеком, 28% кај Оне.Вип, а останатите кај помалите оператори.
Минимален раст на корисниците на интернет
Минатата година завршила со раст од 0.9% кај интернет корисниците. Нивниот број достигнал 1 милион и 159 илјади.
Според регистарот на АЕК во Македонија има 97 субјекти кои нудат интернет услуги.
41% од корисниците на широкопојасен интернет се во мрежата на Македонски телеком, 26% во Оне.Вип, 16% во Роби (Телекабел).
Зголемување на претплатниците на кабелска
Зголемување од 2.5% има кај кабелските телевизии, минатата година завршила со речиси 385 илјади корисници.
Во Македонија има 60 оператори кои нудат кабелска. Најголем удел во пазарот има Оне.Вип со 31%, следи Македонски телеком со 27%, па Роби (Телекабел) со 21%. Другите имаат многу мало учество.
Во 2016-та над 8.000 поплаки до АЕК
Најчесто пријавуван проблем во Агенцијата за електронски комуникации минатата година биле високите сметки, по што следат приговорите за неквалитетна или ненавремена услуга, како и прекини во врските.
Во контакт центарот 190 на АЕК лани имало 8.410 повици, за 982 е поведена постапка за спор, а повеќе од 85% од нив се затворени.
Анализите покажуваат дека 20% од пријавите биле за услуги во говорната мобилна телефонија, а на второ место се споровите за интернет услугите во мобилната телефонија со околу 18%.
На бројот 190 сите корисници на услугите на телекомуникациските оператори можат да пријават евентуални проблеми со она што е во доменот на електронските комуникации: мобилната и фиксна телефонија, мобилeн и фиксeн интернет и телевизијата во земјава.
Контакт центарот во АЕК функционира од 2010 година со цел да се обезбеди подобра комуникација со корисниците на телекомуникациски услуги.
К. Н.