Граничниот премин Евзони е се уште затворен за сообраќај поради штрајк на грчките земјоделци.
Веќе десетина дена грчките земјоделци штрајкуваат на граничниот премин Евзони незадоволни поради даночните и пензиските реформи на грчката влада.
Голема количина на стока за Македонија е заглавена на Солунското пристаниште. Станува збор за никел, јаглен, челик, сол и други суровини, наменети за македонската индустрија.
Алтернативни премини за превозниците се Дојран и Меџитлија, но тоа ќе ги зголеми цените на превозниците.
Министерот за економија Дритон Кучи изјави дека нема да дозволиме да дојде до нафтена или били каква друга криза.
„Блокадата е внатрешен проблем на Грција и се надевам дека што поскоро ќе се реши. Како надлежен орган правиме напори да им олесниме на сите што патуваат кон Грција, а не само на транспортерите“, рече Кучи на денешната пресконференција, одговарајќи на новинарско прашање.
Од Стопанската комора на Македонија се активираа. Претседателот на СКМ, Бранко Азески, упати допис до претседателот на Унијата на грчките трговско-индустриски комори Константин Михалос и до амбасадорот во Македонија Димитриос Јанакакис. Побара веднаш да се вклучат во решавање на проблемот со цел нормализација на сообраќајните врски.
Според податоците на Државниот завод за статистика, Грција е еден од најголемите трговски партнери на Македонија.