Бројот на странски туристи во Турција во месец август падна за речиси 38 проценти, бидејќи туристичкиот сектор е потресен од наводниот обид за државен удар и терористичките напади во оваа земја.
Околу 3,18 милиони туристи во август ја посетиле Турција, што е за 37,96 проценти помалку отколку во август минатата година, се наведува во соопштението на турското Министерство за туризам, пренесува агенцијата Франс прес.
Во јуни е регистриран најголемиот пад во доаѓањето на туристи од 40,86 проценти во однос на истиот период минатата година, додека во јули нивниот број е намален за 36,72 проценти.
Туристичкиот сектор на Турција и пред обидите за државниот удар беше во проблеми поради низата терористички напади во првото полугодие и самоубистените бомбашки напади на Истанбулскиот аеродром во јуни кога животот го загубија 47 лица, и за кои одговорност презеде Исламската држава.
Турскиот сектор за туризам минатата година забележа приходи од 35,1 милијарда долари и има удел во БДП на Турција од 4,4 проценти.
И покрај нормализацијата на односите со Москва во јуни и укинувањето на ембаргото за патување, бројот на посетители од Русија минатиот месец е намален за 83,63 проценти во однос на истиот период минатата година.
Во август минатата година во Турција престојувале скоро 640.000 руски туристи, а оваа година нивниот број падна под 105,000.
Бројот на германски туристи во Турција во август се намали за 34,5 проценти, додека бројот на ирански туристи падна за речиси 32 проценти.