Jужнокорејската компанија Самсунг ги истражува наводите за палење на паметниот телефон Galaxy Note 7 во Кина, иако од компанијата претходно беше соопштено дека сите телефони на кинескиот пазар се безбедни и не треба да бидат опфатени со глобалното повлекување.
Доколку новите наводи се покажат како точни, тоа ќе ги продлабочи растечките проблеми за јужнокорејската компанија со Galaxy Note 7 уредот и неговата батерија, која може да се запали при полнење.
Еден од корисниците на кинеските социјални мрежи во неделата напишал дека Galaxy Note 7 телефонот на неговиот другар за време на викендот се запалил и приложил фотографија од оштетениот уред.
Телефонот, според тврдењата на тој човек, почнал да се загрева и да вибрира, по што експлодирал и од него избил чад.
Во друг случај се наведува дека телефонот експлодирал додека корисникот на него играл видео игра.
Самсунг на 1 септември го пушти во продажба Note 7 во Кина, за следниот ден да објави дека во десет земји во светот, со исклучок на Кина, ќе ја запре неговата продажба и дека ќе повлече 2,5 милиони телефони.
Компанијата во Јужна Кореја започна да испорачува нови телефони Note 7, кои би требало да ги заменат дефектните.
