Лоши вести од Инголштад. Поради дополнителното оптоварувања како последица од дизел аферата и сервисната акција поради можен дефект на воздушните перничиња, „ќерката“ на „Volkswagen“, компанијата „Audi“ ги намалува целите за добивката за 2016-та година поради двата проблема, при што компанијата отпишува речиси 130 милиони евра од балансот за првото полугодие.
Додека досега се очекуваше оперативна добивка во износ од меѓу 8 и 10 отсто, сега поради овие еднократни ефекти се очекува вредност, „малку пониска“ од овој коридор, објави Концернот, цитиран од агенциите.
Во првото полугодие маргината достигна целно ниво од 8 проценти, откако една година порано беше во износ од 9,8 отсто.
Како премиум марка „Audi“ е во центарот на неодамна лансираната стратегија на „VW“ за акцент на електрични возила. До 2025-та година се очекува електричните автомобили да сочинуваат една четвртина од вкупната продажба на концернот. Првиот целосно електричен автомобил Концернот од Инголштад ќе го претстави во 2018-та година и тој ќе биде џип. Така компанијата ќе се обиде да го намали заостатокот од својот конкурент „BMW“, кој неодамна ја претстави втората генерација на електричниот модел „BMW i3“.
