Испораките на компјутери го запишуваат седмиот по ред квартал на контракција. Последните анализи на аналитичките компании „Gartner“ и „IDC“ ја покажуваат и познатата нерамнотежа на пазарот.
Според „Gartner“ испораките на компјутери за вториот квартал од оваа година биле 64.3 милиони примероци, што е за 5.2% помалку на годишно ниво. „IDC“ пак пресметува вкупно 62.4 милиони снабдување и намалување од 4.5%. Тоа е прилично подобро од очекуваното од „IDC“ намалување во износ од 7.4%.
Аналитичарите истакнуваат дека сепак меѓу лошите вести има и добри. Една од нив е дека темпото на намалување почнува да се забавува. Покрај тоа, според двете компании на пазарот во Северна Америка дури веќе забележаа позитивен раст.
„IDC“ забележува дека повеќето производители веќе успеале да се оптимизираат. Ова ги става во подобра позиција за втората половина од годината, која традиционално е многу активна. Сепак „IDC“ смета дека Брекзит негативно ќе се одрази на снабдувањето и во третиот квартал.
Лидер на светскиот пазар останува „Lenovo“ со удел 20.5% и благо намалување. „HP“ останува на втората позиција, така што го зголемува својот удел до 19,1%, а на трето место е „Dell“ со раст до 15.2%.
