Компанијата Балкан Петролеум Холдинг Лимитед, која што на 09.06.2016 објави намера за преземање на Макпетрол АД Скопје, денес 04.07.2016 преку својот полномошник Петар Стојановски извести дека на 01.07.2016 е испорачана банкарска гаранција врз основа на договор склучен со Централен Депозитар за хартии од вредност на Република Македонија.
“Банкарска гаранција е издадена од UBS Zurich Швајцарија на износ од 47.500.000 евра и истата е пристигната во НЛБ Банка од каде што е подигната од овластено лице од депозитарот на 01.07.2016 година. Преку оваа трансакција компанијата Балкан Петролеум Холдинг Лимитед ги демантираше сите невистини и коментари кои деновиве кружеа низ јавноста, а беа поврзани со нејзината несериозна намера за преземање на Макпетрол”, се вели во соопштението.
Од таму велат дека следен чекор на тимот за преземање на компанијата Макпетрол е финиширањето на потребните документи за комплетирање на каталогот со информации за преземачот до Комисијата за хартии од вредност на Р. Македонија, а предавањето е најавено за оваа недела.
