Според најновите податоци, популарната апликација за уредување и споделување фотографии, „Instagram“, сега може да се пофали со 500 милиони корисници.
Уште поважен е податокот дека две третини од корисниците или 300 милиони од нив го користат „Instagram“ секој ден. Со помош на „Instagram“ секој ден се споделуваат околу 95 милиони фотографии и видео содржини, а се забележуваат 4,2 милијарди лајкови.
Во септември 2015-та година „Instagram“ имаше 400 милиони корисници, додека пред четири години, во време кога апликацијата беше купена за 1 милијарда долари од страна на „Facebook“, имаше 30 милиони корисници.
За раст на популарноста на апликацијата најмногу се заслужни корисниците надвор од САД кои сочинуваат 80% од сите корисници на апликацијата. Според предвидувањата на компанијата „eMarketer“, „Instagram“ до крајот на оваа година на „Facebook“ ќе му донесе околу 1,5 милијарди долари во приходи од реклами.
