Баварскиот производител го претстави концептот „2002 Hommage“ по повод одбележување на половина век од лансирањето на прочуеното „BMW 2002“.
„BMW“ и оваа година ја искористи манифестацијата „Concorso d’Eleganza Villa d’Este“ која традиционално се одржува во месец мај на крајбрежјето на езерото Комо во Италија, и тоа овојпат прикажувајќи ни нов концепт базиран на еден од култните автомобили од историјата на самата компанијата.
Минатата година тоа беше концептот „3.0 CSL Hommage“, со којшто му беше оддадена чест на тркачкото „BMW 3.0 CSL“ коешто пак со успех се натпреваруваше на европските писти во 70-те години на 20-от век, а оваа година фабриката одбележува 50 години од култното „BMW 2002“ и „Series 02“.
Моделот „2002“ беше и прв сериски „BMW“ модел којшто во својата понуда имаше и турбо мотор. Во различни верзии, овој автомобил се произведуваше од 1966-та до 1975-та година, кога беше претставена првата генерација од „Series 3“, којашто потоа стана најпродаван модел под логото на „BMW“.
Концептот „2002 Hommage“ претставува комбинација од дизајн на еден модерен автомобил и по некој дискретен ретро детал, како на пример обликот на предните светла или ознаката „turbo“ на предната маска.
Автомобилот е поставен на 20-инчни алуминиумски фелни, а широките нископрофилни пневматици се сокриени под масивните проширувања на калниците.
Со оглед на тоа дека се работи за дизајнерска студија која е направена со цел да се одбележи златниот јубилеј на моделот „2002“, „BMW“ не се потруди премногу да навлегува во спецификациите на моторот и останатите технички детали, па овојпат останавме покуси за тој дел од приказната.
