Корејскиот концерн „Samsung Electronics“ соопшти дека склучил договор со „Alibaba Group Holding“, благодарение на кој корисниците на телефони со неговата марка ќе можат полесно да вршат плаќања со сметки во „Alipay“ – потег со кој се надева дека ќе ја охрабри продажбата на најголемиот пазар на смартфони во светот, пренесува „Ројтерс“.
Корисниците на „Samsung Pay“ исто така ќе имаат можност да плаќаат со сметки во „Alipay“, без да е потребно да имаат дополнителен пристап до кинеската апликација која е водена од делот на „Alibaba“ – „Ant Financial Services Group“, и има 450 милиони активни регистрирани корисници.
„Samsung“, најголемиот производител на смартфони во светот, го пушти својот мобилен систем за плаќања „Samsung Pay“ во Кина уште во март. Тоа се случи еден месец откако „Apple“ започна со „Apple Pay“.
Но доминантната позиција на „Alipay“ значи дека за сите по неа ќе биде многу тешко сами да освојат добра позиција на пазарот.
Од своја страна, „Samsung“ останува во заден план поради своите кинески конкуренти „Huawei Technologies“ и „Xiaomi“, како и „Apple“, така што веќе не се наоѓа дури во топ 5 меѓу повеќето купени марки на смартфони во азиската земја, според „Strategy Analytics“.
