„Volvo“ претстави концептни автомобили со ознаките „40.1“ и „40.2“, кои ќе послужат како основа за продукциските модели од новата серија „40“.
Обновата на семејството модели на „Volvo“, започна со втората генерација на теренецот „XC90“, новата луксузна лимузина „S90“ и караванот „V90“, а продолжува оваа пролет. Очекувано, првиот од двата концепти, „40.1“, e кросовер кој најавува како ќе изгледа новиот сериски „SUV“ – „XC40“.
Другиот концептен автомобил, „Volvo 40.2“, претставува мало изненадување, затоа што станува збор за компактен седан, па Швеѓаните најверојатно во својата гама повторно ќе ја вратат малата лимузина „S40“ која престана да се произведува во 2012-та.
„Volvo 40.1“ и „40.2“ се значајни поради тоа што се првите два автомобили со знакот на шведскиот бренд кои настанале како плод од соработката со кинеската компанија „Geely“, која е сопственик на „Volvo“ oд 2010-та година.
Овие автомобили се поставени на новата модуларна „CMA“ (Compact Modular Architecture) механичка платформа. Покрај „Volvo“, oваа платформа ќе ја користи и кинескиот производител за сопствените модели.
Кога станува збор за надворешноста, двата концепти го следат новиот дизајнерски јазик за автомобилите на „Volvo“, со препознатливи „LED“ дневни светла во форма на буквата „T“ (т.н. „чеканот на Тор“). Седанот позади има карактерситички „C“ стоп светла (веќе видени на лимузината „S90“), додека задните светла кај кросоверот се варијација на стоп светлата кои се наоѓаат кај моделите „XC90“ и „V90“.
„Volvo“ најави дека новото семејство на возила од серијата „40“ во понудата ќе имаат и „T5 Plug-in“ хибриден погонски систем, по примерот на сличната хибридна група „T8“ (во моделите „XC90“, „S90“ и „V90“). Меѓутоа, за разлика од моделите од серијата „90“, каде основата на хибридниот погон ја сочинуваше четирицилиндарски мотор, компактните автомобили од семејството „40“, покрај електромоторот, ќе имаат и трицилиндарски бензински агрегат.
Другиот новитет кој ќе им биде понуден на купувачите е верзијата која ќе се движи исклучиво со помош на електромотор. „Volvo“ најави дека подоцна електричните верзии ќе бидат достапни и кај сите останати модели на овој производител.
По претставувањето на двата концепти, следниот чекор на компанијата ќе биде лансирање на серискиот кросовер „XC40“, во текот на 2017-та. По овој модели ќе следи и новиот „S40“, а потоа и наследникот на актуелниот „V40“, но овие два автомобили би требало да имаат премиера дури во 2018-та или 2019-та година.
