Најголемата социјална мрежа во светот „Facebook“, како и некои нејзини услуги како „WhatsApp“, ја напуштија платформата на „BlackBerry“, пишува „The Next Web“.
Во пост на својот блог „BlackBerry“ ја откри веста, наведувајќи дека до крајот на 2016-та година „Facebook“ ќе престане да работи во „BlackBerry OS“, вклучувајќи ја и најновата верзија „BB10“.
Од компанијата се обиделе да го запрат повлекувањето, но на крајот „Facebook“ и „WhatsApp“ се одлучиле на ваков чекор.
„Се боревме да ги вратиме „WhatsApp“ и „Facebook“, и да го промениме нивното мислење, но во овој момент одлуката им е таква“, посочуваат од „BlackBerry“.
Од компанијата ги повикуваат корисниците да го изразат своето мислење по прашањето на социјалните мрежи, користејќи го хаштагот # ILoveBB10Apps.
„Сепак, ние работевме напорно за да сме сигурни дека крајните корисници имаат најдобро искуство од гледна точка на оваа одлука и продолжуваме да бараме алтернативни решенија“, дополнуваат од „BlackBerry“.
