Економијата се зголемила за 3.55% минатата година. Најновите податоци на државната статистика покажуваат раст на Бруто – домашниот производ (БДП) од 3.9% во четвртиот квартал од 2015-та. Ова се надоврзува на зголемувањето од 3.5%, 3.3% и 3.5% во првиот, вториот и третиот квартал.
Бруто – домашниот производ на Македонија односно вкупниот збир на вредноста на сите стоки и услуги кои биле создадени во земјава во 2015-та е 8 милијарди и 860 милиони евра или 4.282 евра по глава на жител.
Градежништвото повторно главен двигател на економијата
Во периодот октомври – декември лани најголем раст остварило градежништвото од 33.7%, финансиските и осигурителните дејности од 14.9%, стручните и научните дејности од 14.3%, трговијата од 8.5%, информациите и комуникациите од 3.6%, рударството од 1.9%, земјоделството и преработувачката индустрија од по 1.2%. Намалување од 22.1% имало во секторот уметност, забава, рекреација и други услужни дејности, како и од 3.7% во јавна управа и одбрана.
Бизнисмените се оптимисти, велат растот ќе продолжи и во 2016-та со солидно темпо.
„Намалувањето на невработеноста и зголемувањето на економијата е позитивен тренд, очекуваме да продолжи пред се поради активностите на домашните компании и уште поголемата соработка со странските инвеститори, како и поради веќе најавените нови странски инвеститори“,вели Митко Алексов, извршен директор на Сојузот на стопански комори (ССК).
НБРМ: економијата расте со солидно темпо
Податоците на Државната статистика ги потврдија проекциите на Народната Банка. Во најновиот заклучок на Комитетот за монетарна политика стои дека економијата расте со солидно темпо и дека е можно натфрлање на првичните проекции.
„ Во реалниот сектор и понатаму се задржуваат поволните трендови. Најновите расположливи показатели упатуваат на веројатно задржување на солидното темпо и во четвртиот квартал при поволни движења регистрирани во главните економски сектори. Ефектите поврзани со домашните политички случувања се ограничени“, стои меѓу другото во заклучокот што го усвои НБРМ.
К. Н.
