На Интернет се појавија првите фотографии од новиот кросовер на „Toyotа“ кој светска премиера ќе има на саемот во Женева.
„Toyota“ во 2014-та на парискиот авто-саем приреди изненадување кога го претстави концептот купе кросовер „C-HR“. Oвој автомобил имаше радикално поразличен дизајн од актуелните сериски модели на јапонскиот производител, па многумина се сомневаа дека тој ќе добие сериска верзија која ќе наликува на концептот.
Меѓутоа, „Toyota“ се одлучи на храбар чекор, многу стилски детали се пренесени на серискиот „C-HR“, кој ќе дебитира на почетокот на март во Женева.
Навистина, овој кросовер за разлика од првичната дизајнерска студија, од практични причини наместо 3 има 5 врати, додека силуетата на купето е ублажена, па така линијата од покривот повеќе не се симнува нагло кон задниот дел од возилото, а со тоа е добиен поголем корисен простор во кабината за патниците на задните седишта.
Предниот дел е во најголема мера прекопиран од концептот, па „C-HR“ ја задржа агресивната, спортска појава. И позади може да се забележат елементи кои се преземени од концептната верзија, како специфичните „тродимензионални“ стоп светла во форма на бумеранг, дифузор на браникот, „лебдечкиот“ спојлер на покривот…
Од „Toyota“ се уште не објавија спецификации од новиот модел, но познато е дека концептот ќе биде долг 4.350 mm, широк 1.850 mm и висок 1.500 mm. „C-HR“ ќе ја дели механичката „TNGA“ платформа со новиот „Prius“, па во понудата ќе се најде и хибридна верзија.
Новиот кросовер би требало да се произведува во фабриката на „Toyotа“ во Турција, а повеќе детали ќе бидат познати по официјалната премиера на овој автомобил.
