„Lenovo“ го отвори своето учество на „Mobile World Congress“ (MWC) 2016 во Барселона со неколку нови уреди. Меѓу нив се два смартфони и два лаптопи, кои ќе се обидат да освојат уште нови позиции на компанијата во соодветните сегменти.
Лаптопите користат „Windows 10“ за оперативен систем и го следат примерот на уредите од серијата „Surface“ на „Microsoft“. Моделот „Yoga 710“ ќе се нуди со 11- или 14-инчен екран. Помалата опција ќе е со процесор „Core m5“, додека поголемата ќе може да смета на „Core i7“. И двата лаптопи имаат „Full HD“ екрани и можат да стојат во неколку различни начини на работа. „Lenovo“ вели уште дека 14-инчниот модел има иновативна „WiFi“ антена, која ја подобрува врската за 20%.
Другиот модел е „Flex 4“. Тој ќе се нуди со 14- и 15-инчни екрани. Исто така може да работи во неколку начини и да се нарача со „Intel Core i7“, „AMD Radeon R7 M460“ и други. Додека „Yoga 710“ може да работи околу 8 часа на батерија, „Flex 4“ ќе издржи 8 часа и половина, велат од „Lenovo“.
Компанијата ја зголемува и својата палета на паметни телефони со двата нови модели – „VIBE K5“ и „VIBE K5 Plus“. Единствените разлики меѓу нив се дисплејот, процесорот и соодветно цената. „VIBE K5“ има 5-инчен „HD“ екран и 8-core процесор „Qualcomm Snapdragon 415“. Цената ќе му е 129 долари.
„VIBE K5 Plus“ има 5-инчен „Full HD“ дисплеј со 8-core процесор „Snapdragon 616“, а цената ќе е 150 долари. Телефоните имаат 16GB вградена меморија, можност за додавање на повеќе меморија, 13 МР камера со „LED“ блиц на задната страна и 5 МР на предниот панел. Смартфоните имаат и звучници „Dolby Atmos“. Се очекуваат на пазарот од следниот месец.
