„Bentley“ претстави спортска верзија со „V8“ мотор на седанот „Flying Spur“. Таа го доби додатокот „S“ кон името и ќе се распореди меѓу основната модификација на моделот и онаа со „W12“ мотор.
Од стандардниот „Flying Spur“, новата варијанта се разликува по модернизацијата на суспензијата, доработениот екстериер и моќниот мотор.
Машината e опремена со „V8“ Твин-турбо мотор кој развива 21 КС повеќе од сегашниот модел. Тоа значи дека „Flying Spur S“ има 528 КС и 680 Nm достапни при 1700 врт/мин. Во комбинација со 8-брзински автоматски менувач седанот забрзува од 0 до 100 km/h за 4,9 секунди – со 0,3 секунди побрзо од стандардниот модел. Максималната брзина е зголемена за 11 километри и достигнува 306 km/h.
Автомобилот со погон на сите четири тркала исто така добил наштимана суспензија, доработен систем за управување, адаптивни амортизери и оптимизиран систем за стабилизација. Спортската варијанта се разликува уште по црната решетка на ладилникот, задниот дифузер и 20-инчни тркала. Во кабината се поставени специјални седишта во две бои и везови „Flying Spur S“.
Премиерата на спортскиот „Flying Spur“ ќе се одржи на автосаемот во Женева кој ќе стартува следниот месец.
