Следната година „Opel“ на пазарот ќе пушти револуционерен нов електричен автомобил со акумулатори, соопштуваат од германската марка. Моделот ќе го носи името „Ampera-e“ и ветува не само висока практичност, туки и прифатлива цена.
Појавата на „Ampera-e“ е продолжение на најголемата и сеопфатна продуктната офанзива во историјата на „Opel“, вклучувајќи 29 нови модели во периодот меѓу 2016-та и 2020-та година, соопштуваат од брендот. Тие појаснуваат дека пазарната премиера на електричната машина ќе се одржи веќе следната година.
Моделот има 5 места и 5 врати, а од сликите станува јасно дека има релативно компактни димензии. Од „Opel“ тврдат дека внатрешниот простор ќе биде многу великодушен, бидејќи батериите се рамни и интегрирани под подот на возилото.
Конкретни информации за погонот на „Opel Ampera-e“ недостасуваат, но само се наведува дека моделот ќе нуди возбудлива динамика и подолга автономија на дивжење кога батеријата е целосно наполнета од повеќето електрични модели на пазарот.
Според информациите може да се констатира дека „Ampera-e“ ќе се појави на пазарот по прифатлива цена.
Повеќе детали треба да бидат откриени во почетокот на март за време на премиерата на електричниот автомобил на автосалонот во Женева.
